Naghahatid ang Honor of Kings, ang sikat na multiplayer online battle arena (MOBA) mula sa mga developer ng TiMi Studio Group at publisher na Level Infinite, ng mahigit 100 hero sa Epic Games Store para sa Mobile sa Android.

Sa gabay ng Honor of Kings para sa baguhan na ito, ituturo namin sa iyo ang mga pangunahing kaalaman tungkol sa MOBA (tulad ng mga lane), tutulungan ka naming maintindihan ang mga uri at kakayahan ng mga hero, at ihahanda ka para sa unang mga araw mo sa pakikipaglaban.

Pag-unawa sa labanan

Ang tagumpay sa Honor of Kings ay nangangailangan ng balanse ng kaalaman, estratehiya, teamwork, at matalinong paggamit ng kakayahan ng iyong hero—pero bago mo magawa ang lahat ng ito, kailangan mo munang maintindihan kung paano gumagana ang mga laban, kaya magsisimula tayo sa mga kinakailangang malaman hinggil sa Honor of Kings o sa mga MOBA. 

 

Ang Honor of Kings ay karaniwang 5v5 na labanan, kung saan maghaharap ang dalawang team na may tig-limang player sa Hero’s Gorge. Tumatagal ang labanan ng mga 15 – 20 minuto at nagtatapos kapag nasira ng isang team ang base Crystal ng kalaban.

Ang bawat team ay nagsisimula sa kanilang base. Sa pagitan mo at ng tagumpay ay ang mga lane, kalaban (parehong kontrolado ng player at NPC), tore, at halimaw.

Mula sa simpleng setup na iyan, napakaraming posibleng mangyari. At nagsisimula ang lahat sa pagpili ng iyong hero.
 

Mga uri ng hero sa Honor of Kings

Ang mga karakter sa Honor of Kings ay tinatawag na mga hero.
 

May mahigit 100 hero, at bawat isa ay kabilang sa isa o higit pa sa mga uring nasa ibaba. Ang natatanging kombinasyon ng kakayahan at kasanayan sa bawat uri ang dahilan kung bakit mahusay ang isang hero sa ilang gawain at hindi gaano sa iba.

• Ang Mga Assassin ang tagalinis ng labanan. Bigla silang sumusulpot para tapusin ang mga kalabang mababa na ang health, gamit ang kanilang liksi at burst damage. 
• Ang Mga Fighter ay dinisenyo sa pakikipaglaban, na direktang nakikipaglaban sa mga kalaban. Ito ay agresibo at opensibang uri ayon sa disenyo.
• Ang Mga Mage ay dalubhasa sa malalayong atake na may area of effect (AoE) at burst damage, kaya mahusay sila sa crowd control kapag may nangyayaring labanan sa isang lugar. Magaling silang manggulo ng kalaban habang ang mga kaalyado ang nagbibigay ng pangunahing pinsala.
• Ang Mga Marksman ay may malakas na pinsala pero mababa ang depensa, kaya epektibo sila sa pakikipaglaban mula sa malayo. Nagiging makapangyarihang player sila sa huling bahagi ng laro.
• Ang Mga Support ay ang mababait na katuwang sa Honor of Kings mga tagapagpagaling silang handang tumulong at protektahan ang kanilang mga kasama sa team sa pamamagitan ng pagbibigay ng buff, paglalagay ng debuff sa kalaban, o pagsalo ng pinsalang dapat sana ay para sa kanilang mga kasama sa team.
• Ang Mga Tank ay sanay sa pagsalo ng pinsala at karaniwang may mas mataas na health kumpara sa ibang hero. Sinasalo nila ang pinsala at ginugulo nila ang mga kalaban para hindi atakehin ang kanilang mga kasama sa team. 

May mahigit 100 hero sa Honor of Kings, at habang mas madalas mong gamitin ang isang partikular na hero, mas tumataas ang iyong Proficiency. Kung may nabasa kang uri ng hero na gusto mo ang tungkulin, mamili ka ng hero na tumutugma rito at subukang gamitin siya sa laban.
 

Alamin ang iyong mga lane

Sa mga MOBA, mahalaga ang iyong posisyon sa loob ng labanan. May tatlong pangunahing lane sa Honor of Kings, na mga kalsadang patungo sa base ng kalaban, na may dalawang (espesyal) na lugar sa pagitan. 
 

Ang likas na lakas ng bawat hero ay mas angkop sa ilang partikular na lane. 

Ang Mid Lane ay nasa gitna ng lugar ng labanan. Ito ay isang tuwid na daan at ang pinakamaikling distansya sa pagitan ng base ng bawat team. Karaniwan itong ginagamit ng mga mage dahil mabilis silang makakalinis ng lane at makakalipat sa ibang bahagi ng mapa para tumulong. Sa mga MOBA, tinatawag itong ganking, na ibig sabihin ay palihim na paglapit at pag-atake sa kalaban. 

Ang Clash Lane ay nasa itaas na bahagi ng mapa. Ang mga minion dito ay nagbibigay ng mas maraming EXP kumpara sa ibang bahagi, ngunit mas mapanganib dito kumpara sa ibang lane. Karaniwan itong pinupuntahan ng mga fighter at tank, at puwede ring tumulong dito ang mga hero mula sa ibang lane. 

Ang Farm Lane ay nasa ibabang bahagi ng mapa. Tinawag itong Farm Lane dahil ang pagpatay ng mga minion dito ay nagbibigay ng mas maraming ginto kumpara sa ibang lane. Ito ang karaniwang puntahan ng mga marksman para magpalakas sa unang bahagi ng laro, saka umiikot para tumulong sa mga kasama sa team sa ibang bahagi ng mapa.

Ang huling dalawang rehiyon ay para sa mga roaming na hero—karaniwang mga support at tank—na malayang gumagalaw sa mapa at hindi nananatili sa tatlong pangunahing lane. 

Ang Ilog ay dumaraan nang pahilis mula sa kaliwang itaas hanggang sa kanang ibaba ng mapa, at nagsisilbing gitnang bahagi sa pagitan ng dalawang base. Dito nakatira sina Overlord at Tyrant. Kapag natalo mo sila at ang iba pang halimaw, makakakuha ka ng makapangyarihang buff. 

Ang Gubat ay ang bahagi ng mapa na hindi lane o Ilog. Ito ay masukal at puno ng mga halimaw na lumalabas sa walong lugar. Kapag natalo mo sila, makakakuha ka rin ng mga buff. Ang mga assassin at fighter ang madalas na makikita sa Gubat, na kumukuha ng EXP at ginto at bigla na lang sumusulpot para tumulong sa labanan sa ibang lane.

Kung hindi mo pa alam kung saan magsisimula, subukan mong pumili ng hero na akma para sa Mid Lane o Farm Lane. Ang mga lane at role na iyon ay mas direkta, kaya magandang panimula para sa mga baguhan.

Kilalanin ang iyong mga kalaban

May dalawang uri ng kalaban sa Honor of Kings. 

Ang una (at kadalasang pinakamapanganib) ay ang mga player mula sa kabilang team. Ang mga kalabang ito ay malalaki, malalakas, at hindi maikakailang hero na may kaparehong kakayahan at atake tulad ng sa iyo. 

Ang pangalawang uri ng kalaban ay mga NPC na kontrolado ng CPU. 

Kabilang dito ang maliliit na sumusugod sa labanan na tinatawag na minion, at pareho kayong may ganito ng kabilang team. Mahihina lang sila, kusa silang sumusugod sa lugar ng labanan, at maaari silang maging mahusay na panggulo para sa iyong mga kalaban at para atakehin ang kanilang mga tore. 

Sa Gubat, makakakita ka rin ng mga NPC na halimaw. Makakakuha ka ng buff kapag natalo mo sila, gaya ng nabanggit namin kanina. 
 

Alamin ang iyong mga atake at kasanayan

Bawat hero ay may kanya-kanyang natatanging kasanayan, may isang pasibong kakayahan, dalawang normal na kasanayan, at isang ultimate. Makikita ang mga atake nila sa mga button sa kanang ibaba ng iyong screen. Ang icon na may espada ang iyong pangunahing atake, at ang tatlong bilog sa paligid nito ay ang iyong mga kasanayan, na naa-unlock at napapalakas habang naglalaro ka sa bawat laban. Mas malakas ang mga kasanayang ito kaysa sa karaniwang atake, at karaniwang may cooldown, kaya hindi mo puwedeng gamitin ang mga ito nang sunod-sunod. 
Kung hindi mo alam ang ginagawa ng iyong mga kasanayan, mahihirapan kang maging epektibong player. Ang magandang balita ay magaling ang Honor of Kings sa pagtuturo ng mga atake ng bawat hero. 

I-tap mo lang ang menu icon ng Mga Hero sa ibaba ng home screen, at piliin ang hero na gusto mong pag-aralan. Sa kanang gitna ng screen, makikita mo ang mga icon na tumutukoy sa kasanayan ng iyong hero. Kapag na-tap mo ang mga iyon, ipapakita nito sa iyo kung ano mismo ang ginagawa nito—at madalas, kung paano ito gamitin nang epektibo. Ipapakita pa sa iyo ng Skill Combos button kung paano pagsunud-sunurin ang mga atake para sa pinakamalakas na epekto. 

Ang Honor of Kings ay isang malalim at estratehikong laro. Nasa iyo ang responsibilidad na samantalahin ang mga tutorial nito. Kailangan mo lang gumugol ng ilang minuto sa pagbabasa at panonood. Ang pagbibigay ng kahit kaunting oras ay magiging malaking tulong, at makakakuha ka ng kalamangan laban sa ibang baguhan. 
 

Harapin ang mga tore

Bawat lane ay may tatlong tore—isa malapit sa base ng bawat team, isa na medyo malayo pa, at isa sa pagitan ng mga base.
 

Ang Mga Tore sa Base ay nasa tabi ng Base Crystal ng bawat team.

Ang Mga Tore sa Loob ay nasa gitnang bahagi ng lane.

Ang Mga Tore sa Labas ay nasa malapit sa Ilog. Sa likod ng Mga Tore sa Labas ay may Healing Dew, na nagbabalik ng kaunti (pero hindi lahat) ng iyong health at mana kapag nadaanan mo ito.

Ang mga tore ay umaatake ng isang kalaban lang sa bawat pagkakataon, pero malaki ang pinsalang ibinibigay nila sa kalaban na naaabot. Maaabot ka kapag nasa loob ka ng bilog na lumalabas sa paligid ng tore. Ligtas ka kapag berde ang bilog. Pinupuntirya ka kapag pula ang bilog. Tinatamaan ng mga tore ang unang kalabang pumasok sa bilog na iyon, kaya mag-ingat ka. Mas mainam kung ang minion ang sumalo ng pinsala habang inaatake mo ang tore.

Ang pagwasak ng mga tore ng kalaban ay hindi lang nag-aalis ng isang makapangyarihang sandata, kundi pagkakataon din para mapalapit ang laban sa kanilang base. Kapag nasira mo ang lahat ng tore sa isang lane, makakapagpokus ka na sa pag-atake sa Base Crystal ng kalaban para manalo sa laban.
 

Magpagaling

Mabilis tumindi ang laban sa Honor of Kings, at madali mong makalimutang bantayan ang iyong health habang nakatutok ka sa pagiging hero. Bantayan ang pagdilim ng screen, ito ay malinaw na palatandaan na mababa na ang iyong HP. Kapag nangyari ito, may ilang pagpipilian kang mas mabuting gawin kaysa mamatay at maghintay ng ilang segundo bago makabalik sa laban.

Maaari mong gamitin ang Recall na kasanayan para bumalik sa iyong base, kung saan magiging buo ang iyong health at mana pagkatapos ng ilang segundo. Umatras ka muna para makaiwas sa atake, at hayaan mong mapuno ang metro matapos mong pindutin ang Recall button na madaling makita sa ibaba ng iyong screen.

Makikita sa likod ng iyong Mga Tore sa Labas ang Healing Dew item. Umatras at pumunta doon para makakuha ng kaunting buhay. Medyo matagal itong bumalik matapos mo itong gamitin. 

Panghuli, maaari mong gamitin ang iyong Recovery na kasanayan para manumbalik ang kaunting health mo. Para itong Healing Dew na hindi mo na kailangang lakaran. Katulad ng Healing Dew, may oras din ang pagnumbalik ng health mo.
 

Bumili ng mas magandang kagamitan at mag-level up

Bawat laban sa Honor of Kings ay may proseso ng pagpapalakas. Nagsisimula ka sa base-level ng iyong hero, pero habang tinatalo mo ang iyong mga kalaban, nakakakuha ka ng ginto. Pagkatapos, gagamitin mo ang gintong ito para bumili ng pagpapalakas para sa iyong hero sa gitna ng laban.
 

Makikita ang kasalukuyang halaga ng ginto mo sa ilalim ng isang icon sa kaliwang gitna ng screen. Kapag may mga kagamitang maaari mong bilhin, lalabas ito sa tabi ng icon.

Sanayin mo ang sarili mong lingunin ang bahaging iyon ng screen at i-tap ito para sa mga upgrade. Mabilis dumating ang mga ito, at kapag mas maaga mong na-upgrade ang kagamitan mo, mas magiging malakas ka.

Nalalapat ang parehong pangunahing konsepto sa pag-level up sa bawat laban. At sa bawat pagkakataon, may kakayahan kang gumastos at mag-upgrade ng iyong mga kasanayan.
 

Tulungan ang iyong mga kasama sa team

Ang mga pinakamagagaling na team sa Honor of Kings ay nagtutulungan, gamit ang likas na lakas ng bawat hero para suportahan at tulungan ang isa’t isa.

Ang pinakamadaling paraan para makipag-ugnayan habang inaaral mo ang laro ay gamit ang mga icon na makikita sa kanang itaas ng screen na nakaayos nang patayo. I-tap ang mga ito para sabihin sa iyong team kung saan ka pupunta o kung anong tulong ang kailangan mo. Dapat two-way ang komunikasyon, kaya bantayan mo rin kapag ang mga kasama sa team mo ang humihingi ng tulong.

Isipin mong nag-uusap kayo para sabay-sabay na atakehin ang kalabang nag-iisa—iyan ang klasikong ganking sa MOBA (ibig sabihi’y paglilibot sa mapa at pagsalakay sa hindi handang kalaban).
 

Tingnan ang iyong mapa

Ang minimap sa kanang itaas ng screen ang nagpapakita kung nasaan ang lahat. Ito ay libre at laging available na kamalayan sa lugar ng labanan. Ugaliin ang pagsilip sa minimap kada ilang segundo, dahil ang kaalaman sa kinaroroonan ng lahat ay madalas nagsasabi kung ano ang susunod mong dapat gawin. Mabilis mong matutuklasan ang mga pagkakataon para umatake—o mga dahilan para umatras kung mukhang maaabutan ka ng kalaban.
 

Magpokus sa mga pangunahing kaalaman

Marami kang dapat matutunan, at minsan ay nakaka-overwhelm ito. Ang pinakamabisang paraan para hindi malito ay magpokus sa mga batayan. Gampanan mo ang iyong tungkulin at iwasan muna ang masyadong pag-eeksperimento. Umatras kapag kailangan mong magpagaling, dahil mas mabuti nang huminto ng ilang segundo kaysa bigyan ng ginto at EXP ang kalaban. Bilhin ang mga default na upgrade nang hindi nababahala kung akma ang mga ito.

Makakatulong ito para masanay ang muscle memory mo. Habang mas madalas kang maglaro, mas magiging natural ang paggawa ng mga bagay na ito, at mas magkakaroon ka ng espasyo sa isip para magdagdag pa ng ibang estratehiya sa laro mo. Matutunan ang mga pangunahing kaalaman sa Honor of Kings, at mag-eksperimento habang nagiging komportable ka. Ang paglalaro ang pinakamabisang paraan para matuto, at napakarami pang matututunan na lampas sa saklaw ng gabay na ito para sa mga baguhan.

I-download ang Honor of Kings sa Epic Games Store para sa Mobile ngayon, at gamitin ang lahat ng natutunan mo rito sa loob ng lugar ng labanan.