May kontradiksyon sa gitna ng Jurassic World Evolution. Sa kaibuturan nito, ang Jurassic Park ay isang serye ng pelikulang may sakuna. Alam ni Steven Spielberg na magiging mas nakakabagot itong panoorin kung susundan lang ang dino-Disneyland ni John Hammond gaya ng eksaktong nakaplano. At sa serye ng management sim ng Frontier Developments, mas nakatuon ito sa kung ano ang nangyayari bago ang mga kapana-panabik na eksena sa pelikula: ang paggawa ng (madalas) ay gumaganang parkeng may tema ng dinosaur.

Si Andy Fletcher, Game Director ng Jurassic World Evolution 3, ay responsable sa pagdidisenyo ng pinakamapanganib na proyekto sa konserbasyon sa kasaysayan. Siya ang pinakanakakaintindi na ang Jurassic Park management sim ay nangangailangan ng ngipin—ng kaunting hindi inaasahang kaguluhan.

“Hindi lang ito basta zoo para magiliw na makipag-ugnayan sa mga hayop,” sabi niya sa amin. “Iyan ang kaibahan ng isang Jurassic na laro—ang kagustuhang yakapin ang kaguluhan at tanggaping bahagi talaga ito ng karanasan.”
 

Dino crisis

At wala talagang ibang zoo para magiliw na makipag-ugnayan sa mga hayop na tulad nito. Katulad ng blockbuster na estilo ng mga pelikula, hindi ka limitado sa top-down view sa Jurassic World Evolution. Puwede kang sumabak mismo sa aksyon, sa mga naunang laro puwedeng habulin ng mga player ang tumakas na T. rex gamit ang helicopter, habang nagpapaputok ng mga tranquilizer dart na sapat para patulugin ang kawan ng elepante. Sa Jurassic World Evolution 3, maaari ka nang magmaneho ng ATV, mag-inspeksyon, at mag-ayos ng mga bakod nang malapitan—sana lang bago pa magkaroon ng Indoraptor breakout. Ang pinagandang paghawak ng sasakyan ang dahilan ng pagiging mas mabangis at mas nakakasabik na karanasan nito.

Para kay Fletcher, mahalaga ang kakaibang mechanics ng dinamikong action-game para makuha ang tunay na pakiramdam ng prangkisa ng Jurassic na puno ng pananabik, si Spielberg man o Gareth Edwards ang nasa likod ng kamera. 

“Ang nakakasabik na kombinasyon ng visual at gameplay variety na galing sa panganib ang gusto naming tiyaking mapanatili,” sabi niya. “Bahagi iyon ng prangkisa. Bahagi iyon ng kung ano kami, at ng mundong binubuo namin.”

Isa itong malakas na apela—at isa na agad na makikilala ng ilang player ng Tropico 6, Planet Coaster, at iba pang katulad nito. At, sino sa atin ang hindi gumawa ng pool na walang hagdan sa The Sims para lang makita kung ano ang mangyayari? Sa Jurassic World Evolution 3, nandoon pa rin ang tuwa na makapanood ng taong nadaganan ng 60 toneladang Brachiosaurus o nilamon ng gutom na Giganotosaurus. May mga player pa nga ng Jurassic World Evolution na gumagawa ng sariling mga video ng sakuna sa YouTube, pinakakawalan ang lahat ng mababangis na dino para takutin ang mga bisita o kaya’y nagpapagawa ng mga gladiator-style na labanan para makita kung aling predator ang mananalo. 

Pero para sa ibang player, ang tunay na ganda ng genre ay nasa katinuan ng maayos na pinapatakbong parke. Kahit gaano pa ka-immersive, kung tuloy-tuloy kang lumilipat mula sa isang panganib ng dino papunta sa susunod, nakakawala ito ng saya sa mga mas tradisyonal na bahagi ng genre. Hindi madali ang paghahanap ng tamang balanse sa pagitan ng nakakasabik na cinematic safari at ng maingat na management sim gameplay.

Sa mga naunang laro, may Sandbox Mode kung saan puwedeng i-disable ng mga player ng Jurassic World Evolution ang panganib sa mga bisita, ibig sabihin, kahit makatakas ang mga dinosaur, hindi nila kakainin ang mga bisita. Pero para sa Jurassic World Evolution 3, ipinaliwanag ni Fletcher ang mga bagong solusyon na makakatulong sa mga player na panatilihing ligtas ang kanilang parke.

“Sa ikatlong larong ito, ang mga park manager na gusto ng mas mataas na antas ng kontrol at mas detalyadong pamamahala ay puwedeng magpatupad ng mga system para mas makontrol nila ang kaguluhan,” sabi niya. Kasama sa mga system na iyon ang mga maintenance post na nagtatakda ng mga tungkulin sa unang pagtugon sa loob ng partikular na radius, at mga security camera na awtomatikong nag-aalarm at nagpapadala ng grupong manghuhuli kapag may nakalusot sa kulungan.

Siyempre, puwede mo rin namang tanggalin ang lahat ng hakbang sa kaligtasan. “Kapag pinabayaan na mag-isa ang player, nasa kanila kung anong klaseng parke at karanasan ang gusto nilang mabuo,” sabi ni Fletcher. “Lalo na sa Sandbox mode—kung gusto mong maranasan lahat ng panganib, lahat ng kaguluhan mula sa mga dinosaur, puwede mong taasan ang tindi at tingnan kung hanggang saan ka aabot. O puwede mong hinaan iyon at pagtuunan ang malikhaing bahagi ng laro, gumawa ng mga pinapangarap mong kulungan nang hindi nag-aalalang babagsak ito.”
 

Langit ng mga paleontolohiya

Wala rin namang saysay ang lahat ng dino drama kung hindi kapanipaniwala ang mga reptilian na bida. “Mahilig talaga kami sa mga dinosaur,” sabi ni Fletcher tungkol sa kanyang team.

Sa Jurassic World Evolution 3, ipinagmamalaki niyang nalampasan niya ang mga pelikula sa pamamagitan ng pagpapakilala ng isang bagong tuklas mula sa Montana Badlands: ang Lokiceratops, na kinilala lang na bagong uri noong nakaraang taon. Isa sa mga unang nagbahagi ng kagandahan nito sa mas malawak na audience, dinadala ng Jurassic World Evolution 3 ang mga player sa Judith River Formation na binungkal na lugar (kung saan ito hinukay) bilang unang destinasyon sa kanilang globetrotting campaign.

“Isa itong napakaganda at malaking Ceratopsian na may kahanga-hangang malapad na palamuting buto at hindi pantay na mga sungay,” sabi ni Fletcher. “Tuwing may bagong uri ng dinosaur na natutuklasan at lumalabas ang unang guhit sa agham, napapalaki talaga ang mga mata namin at sinasabing, ‘Ang astig nito kung masali natin ito sa laro!’ Isa itong balanse sa pagitan ng mga pamilyar, ng mga dadagdag ng kaibahan sa listahan ng laro, at ng mga bago at kapana-panabik sa mundo ng paleontolohiya.”

Ipinagmamalaki ng Jurassic World Evolution 3 team ang paggawa nila ng mga dinosaur na makatotohanan sa itsura at sa galaw. Mas gumanda pa ang itsura ng mga ito at ng mga natural nilang tirahan, salamat sa mga pagpapahusay sa graphics na nagdadala sa buong parke papalapit sa photorealism.

“May subsurface scattering kami sa balat ng mga dinosaur para magmukha ang mga itong makaliskis, malaman, at totoo,” sabi ni Fletcher. “Halos parang kaya mo na silang abutin at hipuin.”

Kahit pa may malalim na pananaliksik at tulong mula kay Steve Brusatte, ang resident paleontologist ng Universal Studios, nananatili pa ring malaking misteryo ang pag-uugali ng mga dinosaur. Naglaho na sa nakaraang 66 milyong taon ang pagkakataong direkta silang maobserbahan. Kaya gamit lang ang mga pahiwatig mula sa fossil record, kumukuha ang team ng Jurassic World Evolution 3 ng inspirasyon mula sa natural na mundo sa pagdisenyo ng kilos at interaksyon ng mga dinosaur sa laro.

“Para sa mga mas maliliit na Ceratopsian, tumitingin kami sa mga batang rhinoceros at kung paano sila kumikilos sa mga magulang nila,” paliwanag ni Fletcher. “May iba namang dinosaur na mas kahawig ng mga ostrich o emu [katulad ng bagong bipedal na idinagdag na Ornithomimus], at pinag-aaralan namin kung paano sila kumilos, maglakad at gumalaw. Hindi ka gumagawa ng mga halimaw, mga totoong hayop sila noon, mga tunay na nilalang.”

Ilan lang ang kayang ipakitang dinosaur sa Jurassic Park sa runtime nito. Pero sa Frontier, walang ganoong limitasyon, kaya naman makakakita ka ng mahigit 80 iba’t ibang uri sa Jurassic World Evolution 3. Sa mga naunang laro, binuhay nila ang mga paborito ng pop culture tulad ng Triceratops at Velociraptor, pati na rin ang ilang hindi gaanong kilala mula sa mga pelikula (tulad ng nakakatakot na Quetzalcoatlus) o maging ang mga orihinal na nilikha gaya ng sikat na hybrid na Indominus Rex mula sa Jurassic World.
 

Natural na seleksyon

Puwede mong isipin ang Jurassic World Evolution 3 bilang katumbas ng serye ng Pokémon Gold at Silver. Hindi, hindi mo ipapadala ang iyong mga paleontologist ng Expedition Center sa rehiyon ng Johto, pero makikita mo rito ang matatagal nang nasa wishlist ng mga tagahanga: mga batang dinosaur, sexual dimorphism, at natural na pagpaparami.

“Ngayon hindi lang ito tungkol sa mga indibidwal na uri. “Ang mahalaga rito ay kung paano nakikipag-ugnayan ang buong pamilya—ang babae, lalaki, at mga bata—sa isa’t isa, para manatiling malusog ang lahat at mamuhay kasama ng ibang uri,” sabi ni Fletcher.

Malaking bagay ito para sa mas malawak na prangkisa ng Jurassic . Sa unang Jurassic Park, puro babaeng dinosaur lang ang nilikha para maiwasan ang pagdami nila (na hindi maiiwasan) sa senaryo ng pagtakas nila sa kagubatan—pero nagbago ang lahat pagkatapos ng mga kaganapan sa Jurassic World: Dominion noong 2022, kung saan pinakawalan ang dalawang kasarian ng mga dinosaur sa buong mundo.

Bilang resulta, may bagong paraan na ngayon ang mga player ng Jurassic World Evolution 3 para magparami ng dinosaur bukod sa tradisyonal na genetic synthetization ng serye. Maglagay lang ng tamang lugar na pagpupugaran, pagsamahin ang dalawang dinosaur na magkaiba ang kasarian sa isang kulungan habang nasa fertile stage sila ng yugto ng buhay, at ano ang susunod na mangyayari? Hindi na ipinaliwanag ni Fletcher ang tungkol sa pagpaparami at sa halip ay binanggit na lang ang sikat na linya ni Dr. Ian Malcolm, na may kaunting biro: “Nakakahanap ng paraan ang buhay.”

Ang mga batang dinosaur ay nangangailangan ng malawakang pagbabago sa disenyo ng Jurassic World Evolution 3. Iba ang kilos nila kumpara sa matatanda, madalas silang naghahabulan o lumalapit sa ibang uri dahil sa kuryosidad. Bawat bagong henerasyon ay nagdaragdag ng pangangailangan sa kulungan para matiyak na akma ang tirahan nila. May mga pangkapaligiran at panlipunang pangangailangan silang dapat matugunan, mula sa tamang pagkain para sa mga batang Sauropod na hindi pa kayang abutin ang mga dahon sa tuktok ng puno o pangangailangan ng kasama ng ibang batang dinosaur para matutong makihalubilo. Kung maayos mong mapapangasiwaan, magkakaroon ka ng masasaya, malulusog, at naaangkop na mga dinosaur, na siguradong patok sa mga bisita ng parke.

Bagaman ang mga tensyon sa pamilya ay matatagpuan sa anumang uri ng hayop. Ang pagpapalaki ng T. rex mula itlog hanggang sa pagiging ganap na nasa hustong gulang ay magbibigay sa iyo ng patok na atraksyong tiyak na makakaakit ng maraming bisita, pero may hamon ito dahil sa teritoryal na instinct ng mga ito. Kapag ang batang T. rex ay tumanda, magkakaroon ka ng problema. Ayaw ng mapag-isang apex predator ng may kompetisyon. Kapag tumaas ang antas ng kawalan ng ginhawa nila, susunod ang pagiging agresibo, at kailangan mong kontrolin ang populasyon bago mauwi sa marahas na wakas.

Sa kabutihang palad, marami kang kagamitang magagamit para bumuo ng parkeng mabuti para sa mga dinosaur at sa tao. Sa Jurassic World Evolution 3, puwede lumikha ang mga player ng mas kahanga-hangang parke, salamat sa mga bagong terraforming na kagamitan. Maaari kang magpausbong ng mga talampas mula sa patag na lupa, at lumikha ng mga malalalim na anyong-tubig at magagandang tanawin tulad ng talong perpekto para sa iyong mga Megalodon at Plesiosaurus.

Nagbukas ang mga pinagandang kagamatang ito ng pinto para sa mga natural na safari park kung saan nagsisilbing bakod ang mga natural na pader na bato imbes na metal na kulungan. Ang mga sirang lupain ay dinamikong may mga tekstura, na maayos na inilalagay ang mga bato at halaman para magmukhang natural—maliban na lang kung gusto mong ikaw mismo ang maglagay ng bato isa-isa.

At pinadali na rin ng Frontier para sa mga player na ibahagi ang kanilang mga nilikha. Sa bagong Frontier Workshop, puwedeng magbahagi ang mga player sa kahit anong platform ng mga custom-built na parke, kulungan, at tanawaing puwedeng gamitin ng iba.
 

Pangunguna ng mga reptile

May campaign din para sa mga gusto ng mas may direksyon. Ang Jurassic World Evolution 3 campaign ay nagaganap matapos ang isa sa pinakamalaking pagbabago sa timeline ng Jurassic Park. Gaya ng nabanggit, sa Jurassic World Dominion nakatakas ang mga dinosaur sa kagubatan at gumuho ang dating natural na kaayusan.

“Isa iyong punto sa timeline ng Jurassic kung saan nasa buong lupalop ng mundo ang mga dinosaur. Tungkol ito sa kung paano tayo mamumuhay kasama nila, paano sila aangkop sa modernong mundo?” sabi ni Fletcher, na agad nakakita ng bagong oportunidad para sa Jurassic World Evolution na serye. “Ang unang pumasok sa isip namin: Puwede tayong pumunta sa buong mundo, sa kahit saan natin gusto.”

Ipinapakilala ng Jurassic World Evolution 3 campaign ang maraming bagong lokasyon, na nakasentro sa mga sikat na hinukay na lugar na ngayon pa lang makikita sa prangkisa ng Jurassic. Asahan ang malalaking pagkakaiba sa mga biome at estilo ng arkitektura habang pumupunta ka sa mga lugar tulad ng China at Japan na matagal nang hiling ng mga tagahanga. May isang antas pa ngang ginawa mula sa simpleng naturan mula sa orihinal na nobela ni Michael Crichton. Mahigit 30 taon na ang lumipas, sa wakas makikita na natin ang Jurassic Park Europe—at ang heograpiya ng lokasyon nito, ang may bulkang islang malapit sa baybayin ng Portugal, na may natatanging hamon pagdating sa disenyo ng parke. Sa katunayan, karamihan sa mga lokasyong ito ay may kanya-kanyang pagsubok, pananabotahe man o mga gumagalang ligaw na dinosaur.

At Jurassic Park ba talaga ito kung wala si Jeff Goldblum? Buti na lang makakaasa ka sa pagbabalik ni Dr. Malcom, dahil inulit ng Goldblum ang papel na ginampanan niya mula pa simula. Hindi na kailangang sabihin, isang tagahanga si Fletcher. Maaaring maling desisyon ang pagkilala sa mga hero mo—pero huwag mag-alala, ang partikular na Hollywood superstar na ito ay isa sa mga bihirang karakter ng Jurassic Park na hindi naman mangangagat.

“Noong nag-promo kami ng unang laro sa LA, medyo nakakagulat na sandali iyon para sa akin. Kinantahan pa nga niya kami habang nagpapakuha kami ng litrato kasama siya!” sabi ni Fletcher, na kampanteng makakapagpahinga siya sa sesyon ng voiceover tuwing nagbabalik sa tungkulin si Goldblum.

“Palagi niya talagang nagagawa nang tama. Hindi ko na siya kailangang turuan para maging si Dr. Ian Malcolm! Kabisadong-kabisado niya ang karakter na iyon.”

Sasalakay ang Jurassic World Evolution 3 sa Epic Games Store sa Oktubre 21.