Balita
Hands-on sa Tropico 7 sa Gamescom 2025
C
Charlie Wacholz
Halos umikot ang buong demo sa pagtatangkang kumbinsihin ang isang mamamayan. Mula sa karaniwang masa ng isla, pinili ni Dumont ang simpleng lalaking ito para ipakita kung gaano kalawak ang simulation ngTropico 7.
Nagsimula kami sa pagtingin sa kaniyang pangunahing kaligayahan. Tinutukoy ng iba’t ibang salik, mula sa kondisyon ng trabaho hanggang sa pagkakaroon ng iba’t ibang uri ng pagkain malapit sa kaniyang bahay. Lumabas na hindi masaya ang kawawang lalaki. Kahit okay naman ang trabaho niya sa joinery, hindi siya kuntento sa pagkain niya, at ito ay nagpapalungkot sa kaniya. Kaya tiningnan namin ang iba’t ibang pagkaing kinakain niya at pinag-isipan kung paano namin madadagdagan ng pagkakaiba ang diet niya gamit ang kontrol sa industriya at kalakalan. Sa kabila ng pamumuhay malapit sa karagatan, hindi siya nakakuha ng sapat na isda. Nagdesisyon kaming dagdagan ang pondo ng kalapit na grocery para mas maraming pagkaing mula sa dagat ang mapasama sa diet niya, at mag-angkat din ng ilang prutas.
Pagkatapos, sinilip namin ang kaniyang paniniwala sa politika. Gumagamit ang Tropico 7 ng medyo karaniwang political compass, kung saan napapabilang ang lahat sa mga pangunahing paksiyon tulad ng komunista, sosyalista, kapitalista, at iba pa. Isang katamtamang kapitalista ang ating mamamayan at hindi siya lubos na tugma sa bahagyang awtoritaryan at makakaliwa na istilo ng gobyerno na itinakda para sa demo, ngunit medyo bukas pa rin ang kaniyang pag-iisip. May mga mamamayan na mas matindi ang pagiging polarized at mas mahirap impluwensyahan, pero wala talagang ganap na immune sa propaganda.
Para maikalat ang iyong propagandang agenda, kailangan mong sakupin ang isang media outlet at gamitin ito bilang iyong tagapagsalita. Ang bawat lugar ng trabaho, kahit isang istasyon ng radyo o pahayagan, ay may sariling hanay ng iba't ibang uri ng daloy ng trabaho. Sa kaso ng isang pahayagan, mahirap kontrolin ang daloy ng impormasyon sa loob ng isang "Free Spirit" na lugar ng trabaho. Sa halip, binago namin ang istilo ng trabaho tungo sa “Alternate Facts,” upang una’y maghasik ng maling impormasyon at pukawin ang kawalan ng tiwala ng mga tao sa kanilang mga institusyong pang-media, bago tuluyang magpasok ng propaganda at mga batas para makahikayat ng mas maraming botante sa aking partido.
Pinapadali din ng Tropico na subaybayan ang pag-unlad ng aking pampolitikang pananakop. Sa parehong menu at mapa kung saan mo makikita ang iyong pampolitikang positioning sa orientation chart, maaari mong i-toggle ang ilang opsyon, kabilang ang isa upang tingnan ang buong mapa ng mga mamamayan at ang kanilang mga paninindigang politikal.
Nakakaapekto rin ang magkakaibang kautusan at patakaran mo sa iyong sariling katayuan sa political alignment chart bilang isang pinuno. Nagbubukas din ang placement na iyon ng mga bagong patakaran na tumutugma sa iyong pagpoposisyon. Alinsunod sa satirical na tema ng Tropico ,marami rito ang medyo nakakatawa at parang pang-aasar sa mga nangyayari sa totoong politika, ngunit makikita mo rin ang mga karaniwang kontemporaryong desisyon sa pambatasan tulad ng patakaran sa kapaligiran o gay marriage.
At kung sakaling nabigo lahat ng plano mo, may posibilidad na matalo ka sa halalan, na awtomatikong pagtatapos ng laro. Maaari mong baguhin kung paano isinasagawa ang mga eleksyon sa pamamagitan ng mga bagay gaya ng pagpapadoble sa halaga ng balota ng mga mayayamang botante o, kung wala ka nang ibang mapagpipilian, maaari mong suhulan, patayin, pahirapan, ipasok sa institusyon, ipaaresto, o i-brainwash ang mga mamamayan—at kahit direktang bilhin ang eleksyon. Maaaring gumana ang ganitong matitinding hakbang, pero may panganib din itong gawing mas mahirap ang susunod na eleksyon dahil unti-unting mababawasan ang tiwala ng publiko sa iyo bilang isang mabuting pinuno at politiko.
Laging tungkol sa politika, pagbuo ng lungsod, at ekonomiya ang Tropico ngunit kailangan mong maglaro gamit ang lupang ibinigay sa iyo. Sa unang pagkakataon, pinapayagan ng Tropico 7 ang mga player na ganap na i-terraform ang karagatan upang lumikha ng lupa. Isa itong magastos na proseso, pero mahusay na paraan ito para makalikha ng mas maraming pagkakataon para sa tagumpay sa ekonomiya, na kung wala ay mawawalan ng saysay ang iyong politika.
Isinasalarawan ng Tropico 7 ang isang komprehensibo, mapagkakatiwalaan (kung medyo hangal) na sistemang pampolitika at pang-ekonomiya sa halos hindi masukat na antas ng detalye, hanggang sa punto kung saan kahit ang mga basura sa bahay ng bawat mamamayan ay ginagaya. Sa pamamagitan ng pagtatatag ng maraming magkakaugnay na sistema at pagpapalawak sa lalim at paraan ng kanilang ugnayan, ipinapangako ng Tropico 7 ang isang makabagong diktador sim na tatatak sa lahat ng panahon. Kasalukuyan itong nakatakdang ilabas sa Epic Games Store sa 2026. Ilagay ito sa wishlist ngayon.
