Balita
Inilalabas ng Escalation mode ang pinakamalalaking labanan ng serye ng Battlefield 6
G
George Yang
Makalipas ang ilang oras na hands-on sa Escalation, kasama ang dalawang bagong mapa sa Mirak Valley at Operation Firestorm, parang isang hakbang sa tamang direksyon ang bagong mode ng laro ng Battlefield 6 para ma-evolve ang serye.
"Kung tagahanga ka ng Conquest, sana labis mong magustuhan ang Escalation," sabi ng DICE senior producer na si David Sirland sa isang video presentation.
Sa Conquest, pinaglalabanan ng dalawang team ang mga control point sa mapa at binibigyan ng 1,000 "ticket," na nagsisilbing respawn na buhay para maibahagi ng mga player sa kanilang mga sarili. Kapag naubos na ang pool ng 1,000 ticket ng isang team, tapos na ang mga ito—kung mauubos ang round time, kung sino ang mas kaunti ang natitira ay matatalo.
Kinukuha ng Escalation ang konsepto ng Conquest at pinapataas pa ito. Sa halip na limang control point, mayroon na ngayong pitong ganito, na mas nagpapagulo sa Escalation kaysa Conquest. Para makapuntos, dapat hawakan ng isang team ang karamihan sa mga control point na iyon hanggang sa mapuno ang meter sa paglipas ng oras. Panalo ang unang makatatlong puntos.
Gayunman, ang twist dito ay nawawala sa mapa ang isang control point tuwing makakapuntos ang isang team. Humahantong ito sa mas maraming shootout habang patuloy na pinaglalabanan ng mga player ang lumiliit na teritoryo. Pinakamasaya at pinakamagulo ang Escalation kapag magkasinggaling ang mga team at bumaba sa huling dalawa o tatlo ang mga control point. Kapag nangyari iyon, sumasabog ang battlefield na may mas marami pang bala at pagsabog sa bawat sulok. "Habang nagpapatuloy ang labanan, bumababa ang bilang ng mga capture point, nagbabago ang mga frontline at mga pangunahing battlefield, na mapipilitan ka at ang iyong squad na baguhin ang iyong strategy," paliwanag ni Sirland.
Nilaro ko ang Escalation sa parehong mga bagong mapa, na pinakamalalaki ng Battlefield 6 sa kasalukuyan. Mirak Valley ang pinakamalaking mapa ng laro, at higit na nakatutok ito sa mga sasakyan. Isang malawak at bukas na field ito na puno ng mga nayon, tamang-tamang nakahanda na maipakita ang mechanics ng pagkawasak ng Battlefield. Kahit saan ako tumingin, nakasalpok ang mga sasakyan sa mga bahay na para itong mga paper bag, at halos hindi na makilala ang lugar ng labanan nang matapos ang laban. Nag-iwan ito sa akin na impresyon sa kung gaano kalaki ang pinsalang nagawa ng bawat team.
"Isa itong klasikong mapa ng matinding labanan," sabi ni Sirland. "Sinusuportahan nito ang infantry, lupain, at mga sasakyang panghimpapawid, ang perpektong kombinasyon na nagbibigay-kapangyarihan sa iyo na gumawa ng sarili mong mga sandali na 'sa Battlefield lang'."
Malawak ang Mirak Valley, at madali lan makalibot ang mga sasakyan sa paligid, ngunit mayroon ding mga lugar kung saan puwede kang makisali sa malapitang labanan at barilan. Sa gitna ng mapa, may isang lugar ng konstruksyon na may mas matataas na palapag na aakyatin. Nagbibigay-daan ito sa mga player na maging malapit at personal sa isa't isa, gamit ang mga construction beam at cinder blocks para matakpan at maitago ang kanilang mga sarili sa view, at may mga sasakyang humahabol sa kanila mula sa labas. May kaunti ng lahat ng bagay ang Mirak Valley para gawing sariwa ang bawat sandali ng gameplay sa bawat segundo.
Ang pangalawang mapa na Operation Firestorm, ay remake ng isang gustong-gustong mapa ng Battlefield 3. Nakatakda ito sa isang bagong lokasyon, ngunit mayroon pa ring mga oil refinery at backdrop na disyerto na gustong-gusto at kilala ng mga beterano. "Ngayon, huwag mo akong masamain, gustong-gusto ko ang Operation Firestorm noong panahon ng BF3, ngunit ang isang mapa na halos 15 taong gulang ay nangangailangan ng ilang pag-update," paliwanag ni Sirland. “Mga visual, mga bahaging natatakpan, linya ng paningin, at, siyempre, pagkasira.”
Mas nakatuon sa labanan ng sasakyan ang Operation Firestorm kaysa Mirak Valley. Bagama't may mga container ng kargamento at gusali, mas nakakalat ang mga ito sa mapa kumpara sa mga nayon ng Mirak Valley, na nagtatampok ng mga grupo ng maliliit na bahay na puwedeng pagtaguan ng mga player. Naging mas malinaw ito nang maglaro ako ng Escalation sa Operation Firestorm. Kapag kumukuha ng mga control point, may kakayahan ang mga sasakyan na lumapit dito, na nagpapahirap sa paghuli sa kanila kumpara sa mga nasa Mirak Valley. Kung hindi ka nakasakay sa loob ng isang sasakyan, malaki ang posibilidad na maalis ka kaagad. Hindi ko na mabilang kung ilang beses pinasabog ng sasakyan ang isang oil tanker para lang madamay ako sa pagsabog, napuno ng apoy ang buong screen ko. Puro kaguluhan ito, at nasiyahan ako sa paglalaro sa Operation Firestorm kaysa sa Mirak Valley.
May nakakagulat din na dami ng pataas ang Operation Firestorm. Puwede mong akyatin ang mga refinery ng langis para maabot ang tuktok, na nagbibigay sa iyo ng malinaw na tanawin ng buong mapa. Perpektong lugar ito para sa mga sniper na gustong tirahin ang mga nasa ibaba. Ang mas mabababang palapag sa refinery, katulad ng lugar ng konstruksyon sa Mirak Valley, ay mga sikat na lugar din para sa shootout kapag walang sasakyan.
Panghuli, tinalakay ni Sirland ang ilan sa mga bagong pangunahing update at pagbabago ng baril. Sa panahon ng bukas na beta at sa aming huling hands-on na preview, nabanggit ng mga player na sobrang lakas ng mga shotgun, na dahilan para hindi maging mainam ang mga mode ng laro na Team Deathmatch at Domination. Isa sa mga mas kapansin-pansing pagbabago ay nangangailangan na ngayon ng mas maraming shell ang M87A1 shotgun para siguradong makapatay, na gugustuhin ng mga player na matutunan.
Na-adjust din ang sistema ng paggalaw. Sa Call of Duty, may sikat na pamamaraan ng paggalaw na tinatawag na slide cancelling, ito ang aksyon ng pagkaripas saka pagdausos, pagkatapos ay pagkansela ng aksyon sa pamamagitan ng paglukso o pagpuntirya. Nagbibigay-daan ito sa mga player na manatiling maliksi habang inaabala din ang mga kalaban. Bagama’t walang slide cancelling ang Battlefield 6, hindi nito napigilan ang mga open beta player na subukang maghanap ng paraan para makopya ito. "Ang momentum, lalo na ang pahalang na bilis na mula sa pagdausos saka pagtalon ay nabawasan," sabi ni Sirland.
Idinagdag pa niya: "Mas pinataas na rin namin ang kamalian kapag nagpapaputok habang tumatalon o nagpapadausos, para makatulong sa bilis ng gameplay na nagbibigay-gantimpala sa mahuhusay na galaw nang hindi nagiging sobrang bilis o hindi nahuhulaan."
Nang masubukan ang Escalation, ang dalawang bagong mapa, at mga pag-adjust ng gameplay, sa tingin ko maaaring maging susunod na entry na paborito ng tagahanga ang Battlefield 6 na matagal nang hinihintay ng mga tagahanga. Malinaw na nakikinig sa userbase ng prangkisa ang mga developer, ngunit pinaninindigan din ang kanilang sariling pananaw na makagawa ng pinakamakatotohanang at masayang karanasan sa Battlefield sa loob ng maraming taon.
Battlefield 6 ilulunsad sa Oktubre 10. Puwede mo na itong i-wishlist sa Epic Games Store ngayon.